媽媽的生日晚餐

４點幾食完tea，６點就要食晚飯．．．．邊食得落呀！

廚房大廚知到阿媽會去食飯，一早就炮製一味”火龍果鮮蝦什果沙律”比佢試。(Good!好好好味呀！）。跟住食D嘜．．小籠包，擔擔麵，松子魚，BB鴨，花膠海蔘，冷盤，沙鍋雲吞雞和經理自製甜品等等。生日當然有壽包和蛋糕。叫老豆V宇手和阿媽合照，佢都好合作（睇到都好笑）

支持X版

巢小姐上星期已經約咗Gloria契媽今日帶佢去North Point仙樂買X版韓劇碟。

千里條條叫我過海的唯一原因就係．．．幫佢比錢。（即人肉提款機）

１點３就到咗炮台山地鐵，Gloria帶我哋去城市花園順壽司日本料理食Lunch。

我和巢小姐都叫咗牛肉鍋，我覺得味道都幾好，但巢小姐就覺得唔夠味，係咁落鼓油。如果下次再去食我會試吓Gloria叫的燒牛肉飯，D牛肉好好味。

食飽當然出發去買碟，日劇＄２０，韓劇＄１０非常扺買，Derby買咗一隻韓劇，Gloria買咗五六隻今季最新日劇。我就比較環保，我叫Gloria睇完半價轉讓比我睇。

哈哈！佢當然話唔使收我錢，我黎緊會好忙啦！

由於今晚要去將軍澳大佬到食飯，買完碟我哋就去咗將軍澳新都城行吓街。

點知Gloria問我和Derby有無興趣陪佢放狗，Derby當然舉腳話好（又可以做烏烏主人）。我就怕熱無去，call咗三媽出黎下午tea一 tea。佢帶我去咗百隹superstore入面美食廣場食嘢。

20週年紀念

今日除咗有新同事加盟外，亦是我踏入社會做事２０年了。
好少人好似我一樣第一份一做就２０年。
一講時間就知我貴庚．．．．．總之就老啦！

New Team Member － Thomas

等咗成個月，今日卒之有新同事返工啦!

之前聽Iris講該新同事貌似”技安”，身材高肥，講嘢同我一樣大聲（不過唔係無禮貌）

但係今早一見，除咗後者我覺得正確外，貌似”技安”就唔多似啦！

他一早返到公司，大房老板竟然要單獨接見佢，我哋個個都覺得好奇怪。

因為老板未試過接見我哋D small potato。（如果係我就會腳震．．．震）

Welcome Lunch 我哋去咗上次我食唔飽的餐廳Shakey's Pizza。

我哋９個人叫咗一個價值２佰多元的１３吋龍蝦Pizza，兩碟意粉，兩碟雞翼，薯餅，細Pizza，燒骨和蟹肉捲。今日竟然食得飽，下次食飯一定多人食先得啦！（可以叫多D嘢）

今餐由Iris比錢，食到咁貴真係唔好意思。不過都要講聲多謝！Thank you very much!

**Full Team 啦！我覺得佢一定會做得長。因為佢係Iris介紹黎，唔會唔比Face Iris**

新玩具

想換電話計劃已經有2個幾月，包包陪我去睇電話問價都10幾次。我估佢都覺得我煩，但係大拿拿2千幾銀，唔係買斤菜，都係要想清楚好。

最後都係買返NOKIA- 5610 XpressMusic，貪佢聽歌方便，價錢要HK$2,190，用舊機trade-in只需比HK$1,740。用咗一日OK啦！

與烏烏共進午餐

今天的午餐約會，是在將軍澳新都城的香辣屋。有我、Gloria、Derby and烏烏。（Wow wow）

我哋都好大食，３個人叫咗（一隻雞、豬頸肉、炒粉、咖哩牛根腩和蒜茸包 ）都可以食得晒。不過以上食物烏烏只有得睇無得食，你都咪話唔慘呀！

食完飯，Derby當正自己係烏烏主人，推住架BB車在新都城週圍行。（唔知係咪烏烏受歡迎，所以佢要爭住推車）

到咗４點左右，烏烏係時間要去方便，所以Gloria和 Derby同佢去公園行吓。我就自己在商場行吓，又比我遇到Regina和女女一齊（佢哋兩個成個餅印）。

Derby放完烏烏。我見仲早，就提議到 東港城行吓和去大佬到食飯。其實午餐仍未落格，入到去佢D同事問我哋要唔要減肥，仲立即送上楊枝金露、甘吉特飲、最後自己order担担麵和冷盤

(我都係第一次未食飯先食甜品，唔肥都唔得啦！）

一個唔返工去咗賭的星期五

政府都有宣傳<唔好沈迷賭博>
如果我有聽政府講就唔使交咗$800學費啦！
唔係星期二在Jusco遇到Connie就唔會約佢今日放假打麻雀。
由11:00打到8:30pm足足１６圈，無停過。（返工都無咁勤力）
最後重比Derby話我＜哈．．．．哈．．．．有工唔返去打麻雀．．．．．＞